राधिका भुसाल
प्युठान,९ साउन । प्युठानमा संघ र प्रदेशबाट प्राप्त पूँजीगत बजेटमध्ये ठूलो हिस्सा खर्च हुन नसकी फिर्ता गएको छ।आर्थिक वर्ष ०७९।०८० मा जिल्लाको पूँजीगत विकासका लागि आएको रकममध्ये रू ३०करोड ३८ लाख ८० हजार ५ सय ३४ रुपियाँ बजेट खर्च हुन नसकेर फिर्ता गएको हो । जिल्लामा संघतर्फ रू ८० करोड ९८ लाख ४४ हजार र प्रदेशतर्फ रू एक अर्ब ३२ करोड ८२ लाख २७ हजार गरी कूल रू दुई अर्ब १३ करोड ८० लाख ७१ हजार बजेट प्राप्त भएको थियो ।
प्राप्त बजेटमध्ये संघतर्फ रू ६६ करोड ५५ लाख ३७ हजार एक सय ५८ रुपैयाँ र प्रदेशतर्फ रू एक अर्ब १६ करोड ८६ लाख ५३ हजार तिन सय छ रुपैयाँ गरी कूल रू एक अर्ब ८३ करोड ४१ लाख ९० हजार चार सय ६४ रुपैयाँ खर्च भएको कोष तथा लेखा नियन्त्रक कार्यालय प्युठानका प्रमुख कोष नियन्त्रक देब राज पोख्रेलले जानकारी दिनुभयो । उहाँका अनुसार खर्च हुन नसकेर फिर्ता गएको बजेटमध्ये संघको रू १४ करोड ४३ लाख ६ हजार आठ सय ४२ रुपैयाँ र प्रदेशको रू १५ करोड ९५ लाख ७३ हजार ६ सय ९४ रुपैयाँ रहेको छ।
जिल्लामा संघतर्फ रू पाँच अर्ब ४३ करोड २५ लाख २३ हजार आठ सय २९ रुपैयाँ र प्रदेशतर्फ रू ९१ करोड ६० लाख २६ हजार एक रुपैयाँ गरी चालुतर्फ रू छ अर्ब ३४ करोड ८५ लाख ४९ हजार आठ सय ३० रुपैयाँ प्राप्त भएको थियो।चालुतर्फ खर्च बजेट संघको रू पाँच अर्ब ७ करोड २६ लाख ९५ हजार दुई सय ३१ रुपैयाँ र प्रदेशतर्फ रू ७४ करोड ५७ लाख ६५ हजार एक सय ८८ रुपैयाँ गरी कूल रू पाँच अर्ब ८१ करोड ८४ लाख ६० हजार ४ सय १९ रुपैयाँ खर्च भएको छ ।
