शुसिला बुढा
१४ श्रावण,प्युठान।
जिल्लाका निर्माण व्यवसायीले काम गरेबापतको रकम भुक्तानी पाउन नसकेकाे भन्दै आन्दोलित भएकाछन् । विभिन्न निर्माण योजना सम्पन्न भए पनि असार मसान्तमा उनीहरुले भुक्तानी पाउन नसकेका हुन् । त्यसैले रकम भुक्तानीको माग गर्दै व्यवसायी आन्दोलित हुनु परेको बताए ।
जिल्लाका बिभिन्न योजनाहरुमा काम गरेवापत किरब ३० करोडभन्दा बढी रकम निर्माण व्यवसायीले भुक्तानी पाउन बाँकी रहेको निर्माण व्यवसयी संघ प्युठानका अध्यक्ष नवीनकुमार श्रेष्ठले बताउनुभयाे । सडक डिभिजन कार्यालय, खानेपानी तथा सरसफाइ डिभिजन कार्यालय र विभिन्न स्थानीय तहबाट उक्त रकम भुक्तानी हुन नसकेको उहाँले गुनासो गर्नुभयाे ।
निर्माण व्यवसायी संघ प्यूठानका महासचिव नारायण ज्ञवालीका अनुसार करिब १३ करोड रुपैयाँ खानेपानी डिभिजनमा, १८ देखि २० करोड सडक डिभिजनमा र २ देखि ३ करोड स्थानीय तहहरुबाट भुक्तानी लिन बाँकी छ । रकम भुक्तानी नहुँदा निर्माण व्यवसायीहरु अप्ठ्यारोमा परेकाे उहाँले बताउनुभयाे ।
निर्माण व्यवसायी संघ प्यूठानले सांगठनिक रुपमा बिभिन्न माग सहित रकम भुक्तानी हुनु पर्ने भन्दै आइतबार जिल्ला प्रशासन कार्यालय प्युठानमा एक घण्टा धर्ना दिएको छ । संघले विभिन्न ९ बुँदे मागसहित प्रमुख जिल्ला अधिकारी मार्फत प्रधानमन्त्रीलाई ज्ञापन पत्र बुझाएको हो । संघले यश अघिनै जिल्लाका राजनीतिक दलका नेतृत्वको ध्यानाकर्षण गराएको जनाएकोछ ।
चरणबद्ध आन्दोलन अन्तर्गत जिल्लामा पहिलो चरणको आन्दोलनका कार्यक्रम गरिएको र माग पूरा नभए आन्दोलन थप सशक्त बनाउँदै जाने संघका अध्यक्ष श्रेष्ठले बताउनुभयाे ।
