बुटवल। नेकपा एमाले लुम्बिनी प्रदेशको अध्यक्षमा राधाकृष्ण कंडेल निर्वाचित हुनुभएको छ । अध्यक्षका प्रत्यासी हरि प्रसाद रिजाललाई २ मतान्तरले पराजित गर्दै कँडेल दोस्रो पटक पनि प्रदेश अध्यक्षमा निर्वाचित हुनुभएको हो ।
मंगलबार भएको मतदानमा कुल खसेको ९ सय ६५ मतमध्ये कँडेलले ४७९ मत पाउनुभयो भने उहाका प्रतिद्वन्द्वी रिजालले ४७७ मत पाउनुभयो । पदाधिकारीमा सचिवसहित भूगोलतर्फ १२ मध्ये ८ जिल्लाका सदस्य निर्विरोध निर्वाचित भएका थिए । पाँच पदाधिकारीमध्ये चार पदमा निर्वाचन भएको थियो । यसबाहेक भूगोलतर्फ रुपन्देही, गुल्मी, बाँके र दाङ जिल्ला गरी चार जिल्ला, लेखा कमिटी र प्रदेश खुलातर्फ मतदान भएको हो ।त्यस्तै गरी उपाध्यक्षमा रुपन्देहीका भोजप्रसाद श्रेष्ठ ४५५ मत ल्याएर विजयी हुनुभएको छ । उहासँगै रुपन्देहीका विश्वराज बरालले ३०६, बाँकेका पुजन विश्वकर्माले ९८, रुकुमका शान्तकुमार वलीले ५६ मत ल्याउनुभएको छ । उपसचिव खुलामा पूर्ण बुढामगर ४१८ मत ल्याएर निर्वाचित हुनुभएको छ। उहासँग दुर्गाप्रसाद थारू चौधरीले ३९३, उपेन्द्रलाल कामीले ११० मत ल्याउनुभएको छ । महिला उपसचिवमा लिला रानामगर ३५२ मत ल्याएर विजयी हुनुभएको छ । उहासँग बसन्ती अधिकारीले ३५१ र आरती पौडेलले २२१ मत ल्याउनुभएको छ । यस्तै लेखा समिति अध्यक्षमा दामोदर घिमिरे विजयी हुनुभएको छ । उहाले प्रतिस्पर्धी विष्णुराज बीसीलाई २०७ मत अन्तरले पराजित गर्नुभएको हो ।
विजयी उम्मेदारहरुलाई बुधबार बिहान ९ बजे नै शपथग्रहणको कार्यक्रम राखिएको निर्वाचन मण्डलले बताएको हो । पदाधिकारीमा निर्वाचित उपसचिव पूर्णबहादुर बूढाबाहेक सबै कँडेल समूहका हुन्।कँडेललाई उपाध्यक्ष विष्णु पौडेल पक्षको समर्थन थियो भने रिजाललाई महासचिव शंकर पोखरेल पक्षको साथ थियो ।
प्रदेश अधिवेशन भएपनि यो निर्वाचनलाई एमालेका प्रभावशाली नेताद्वय पौडेल र पोखरेलको शक्ति परीक्षणको रुपमा एमाले भित्र चर्चा भएको थियो ।
