काठमाडौं । काठमाडौंमा आइतबार भएको सवारी दुर्घटनामा एक महिलाको मृत्यु भएको छ । कोटेश्वरमा गएराति मिनी ट्रकको ठक्करबाट मोटरसाइकलमा सवार पाँचथरको मिक्लाजुङ गाउँपालिका ५ घर भई हाल काठमाडौंको काँडाघारी बस्ने अन्दाजी ३४ वर्षीया सम्झना राईको मृत्यु भएको हो ।
गम्भीर घाइते भएकी राईको महाराजगञ्जस्थित त्रिवि शिक्षण अस्पतालमा मृत्यु भएको प्रहरीले जनाएको छ ।
प्रहरीका अनुसार कोटेश्वरबाट जडिबुटीतर्फ जाँदै गरेको ना ५ ख २८१९ नम्बरको मिनी ट्रकले सोही दिशातर्फ जाँदै गरेको बा ७१ प ३०५४ नम्बरको मोटरसाइकललाई आइतबार राति पौने १० बजे ठक्कर दिएको थियो ।
अनुसन्धानबाट राईले राइड शेयरिङ प्लेटफर्म पठाओबाट अफलाइन यात्रा गरेको खुलेको छ ।
‘पठाओमा राईको नम्बरबाट रिक्वेस्ट पठाएको र यात्रा सुरु हुनुअघि राईले नै राइड क्यान्सिल गरेको देखिएको छ,’ पठाओकी प्रवक्ता सुरक्षा हमालले भनिन् ।
उनका अनुसार पठाओबाट अफलाइन यात्रा हुँदा मृतक राईको परिवार बीमा सुविधाबाट वञ्चित भएको छ ।
हाल पठाओ यात्राका क्रममा मृत्यु वा अपांगता हुन पुगेको खण्डमा एभरेष्ट इन्स्योरेन्समा १० लाखसम्मको बीमा दाबी गर्न सकिने व्यवस्था छ ।
तर अफलाइन राइड भए राइडर र यात्रु दुवैले बीमा सुविधा नपाउने हमाल बताउँछिन् ।
‘आइतबार राति भएको सवारी दुर्घटनाको प्रमाण हामीसँग छैन,’ उनले भनिन्, ‘अनलाइन राइड हुँदा सबै विवरण एपले नै ट्रयाक गर्छ । तपाईं कहाँबाट कहाँ पुगिरहनुभएको छ भन्ने कुरा एपबाटै ट्रयाक भइरहेको छ । तर अफलाइन यात्राको विवरण नहुँदा बीमा सेवा प्रदायकले रकम भुक्तानी गर्न सक्दैन ।’
पठाओ अनलाइन राइड शेयरिङ सेवा भएकाले राइडरले क्यान्सिल गरेपनि प्रयोगकर्ताले थाहा पाउन जरूरी भएको उनी बताउँछिन् ।
‘राइडरले क्यान्सिल गर्न लगाएको अवस्थामा पठाओमा कम्प्लेन गर्न वा अर्को राइड बुक गर्नसक्ने विकल्प छ । तर अफलाइन यात्रा गर्नु हरेक किसिमले जोखिमयुक्त छ,’ उनी थप्छिन् ।
उनका अनुसार यात्रुले राइडकै क्रममा आफ्नो विवरण सोसल मिडियामा आफन्तलाई पनि शेयर गर्नसक्छन् । चढिरहेको र चढ्ने व्यक्ति दुवैको जानकारी एपमा देख्न सकिन्छ । तर अफलाइन यात्रामा कुनै जानकारी हुँदैन ।
नियमित रूपमा पठाओ प्रयोग गर्ने यात्रुका लागि ‘प्रोमो कोड’ पनि उपलब्ध गराइरहेको जानकारी दिँदै हमालले यात्रुले आफ्नो यात्रालाई अझ सस्तोसमेत बनाउनसक्ने बताइन् ।
‘साथै एपमै रातो बटन दिइएको छ, जसमार्फत प्रयोगकर्ताले कुनै आपत परे १०० मा डायल गरी प्रहरीलाई जानकारी दिने विकल्प पनि छ,’ उनले भनिन् ।
यसैबीच अर्को सातादेखि ‘पठाओ सुरक्षा कबच’ अभियान सुरू हुन लागेको उनले जानकारी दिइन्
