प्युठान,१३ असार ।
ऐरावती गाउँपालिकामा सामुदायिक मेलमिलाप सम्बन्धी आठ दिवसीय(४८ घण्टा) आधारभुत तालिम सुरु भएको छ । स्थानीय न्यायिक समिति ऐरावती गाउँपालिकाको आयोजनामा तालिम सुरु भएको हो ।
तालिमको आज एक औपचारिक कार्यक्रम गरी उद्घाटन गरिएको छ । गाउँपालिकाका कार्यवाहक अध्यक्ष कृष्णप्रसाद श्रेष्ठको अध्यक्षतामा भएको उद्घाटन कार्यक्रममा गाउँपालिकाका निमित्त प्रमुख प्रशासकीय अधिकृत बालगोपाल श्रेष्ठ, ऐरावती गाउँपालिका वडा नं १ का वडा अध्यक्ष अमरबहादुर रेस्मीमगर , प्रशिक्षक अधिवक्ता गणेश कठायत, रोहित देउवा, न्यायिक समिति सदस्य , पालिकाका कर्मचारी, मेलमिलापकर्ता लगाएतको उपस्थिती रहेको थियो ।
स्थानिय तहमा आएका मुद्धाहरुलाई गाउँ,टोल बस्तीमा मेलमिलापकर्ताहरु मार्फत मेलमिलाप गराउने र सेवाग्राहीलाई न्यायिक पहुँचमा समान र सहज रुपमा न्याय उपलब्ध गराउने तालिमको मुख्य उदेश्य रहेको न्यायिक समिति ऐरावती गाउँपालिकाका सदस्य सचिव विनोद कुमार त्रिपाठीले बताउनुभयो ।
सामुदायिक मेलमिलापकर्ताहरुको लागि आयोजना गरिएको आधारभुत तालिममा मेलमिलाप प्रकृया,न्यायिक समिति, मेलमिलापसंग सम्बन्धी कानुनी व्यवस्था, मेलमिलापकर्ताको व्यवहारिक अभ्यास , स्थानीय सरकार संचालन ऐन २०७४ को दफा ४७ (१) र (२) मा उल्लेखित न्यायिक समितिको क्षेत्राधिकार लगाएतका विषयमा छलफल गरिने तालिमका प्रशिक्षक अधिवक्ता रोहित देउवाले बताउनुभयो । ८दिन सम्म तालिममा प्रत्येक वडाबाट ४ जना गरी २४ जना साथै न्यायिक समितिका पदाधिकारी १ जना कर्मचारीको सहभागिता रहेको छ ।
उद्घाटन कार्यक्रममा ऐरावती गाउँपालिका वडा नं १ का वडा अध्यक्ष अमर बहादुर रेस्मीमगरले तालिम पश्चात समुदायमा हुने समस्याहरुलाई समुदाय स्तरमै समाधान गर्न महत्वपूर्ण भूमिका खेल्ने बताउनुभयो । समाजमा विभिन्न घटनाहरु, बादविवादहरु हुने गर्दछन्, वडा अध्यक्ष रेस्मीले भन्नुभयो, समाजलाई एकिकृत गर्न मेलमिलापकर्ताको महत्वपूर्ण भूमिका हुन्छ ।
कार्यक्रममा गाउँपालिकाका कार्यवाहक अध्यक्ष कृष्णप्रसाद श्रेष्ठले पालिका भित्र रहेको स्थानीय न्यायिक समितिमा दर्ता भएका मुद्धाहरुलाई मेलमिलापबाट समाधान गर्दै आएको बताउनुभयो । यो तालिम पश्चात मेलमिलापकर्ताहरुले न्यायिक समितिलाई सहयोग गर्नुहुनेछ भन्ने विश्वास लिएको उहाँको भनाई छ ।
