प्युठान, २२ असार । गौमुखी गाउँपालिका– ६ लिवाङका २८ वर्षीय पदम बहादुर के.सी.ले गाउँमा विरुवा उत्पादन गर्नुहुन्छ । गाउँको आफ्नै जग्गामा ०७५ सालदेखी के.सी.ले विभिन्न जातका विरुवाको नर्सरी राखेर विरुवा उत्पादन गरि विक्री गर्दै आउनुभएको छ ।
‘आफ्नै आठ रोपनी जग्गामा नर्सरी गर्दै आएको छु,’ उहाँले भन्नुभयो, ‘यहि नै मेरो आम्दानीको स्रोत बनेको छ ।’ नर्सरीमा विभिन्न जातका घाँसका विरुवा र टिमुरको विरुवा उत्पादन गर्ने गरेको के.सी. बताउनुहुन्छ । उहाँका अनुसार उत्पादन गरेका विरुवाहरु जिल्लाभित्र नै खपत हुँदै आएको छ ।
‘शुरुमा थोरै लगानी गरेर नर्सरी शुरु गरेको थिए,’ उहाँले भन्नुभयो, ‘अहिले राम्रो व्यवसाय गरेछु भन्ने लागेको छ ।’ व्यवसायबाट के।सी।ले वार्षिक ६ लाख रुपियाँ आम्दानी गर्दै आउनुभएको छ । ‘रोजगारीका लागि विदेश जान पासपोर्ट बनाएर बसेको थिए,’ विगत सम्झिदै के.सी.ले भन्नुभयो, ‘सँगैका साथी विदेशमा छन, मलाई भने नर्सरीले रोक्यो ।’
के.सी.को ६ जनाको परिवार छ । घरदेखि नजिकै रहेको नर्सरीमा सिजनका बेला के.सी.को श्रीमती मिठाले पनि सघाउनुहुन्छ । गाउँमा परिवारसँगै बसेर आयआर्जन गर्न पाउँदा खुशी मिलेको उहाँ बताउनुहुन्छ । ‘गाउँमै जिविकोपार्जन भएको छ,’ उहाँले भन्नुभयो, ‘विदेश जान परेको छैन, दुःख गरे गाउँमै पनि कमाई हुँदो रहेछ ।’
