सलिम अन्सारी
प्युठान ,१० असार ।
प्युठानको सरुमारानी गाउँपालिकामा सवै जनप्रतिनिधीहरुको
लागि एकै किसिमको पोशाक लागू भएको छ।
अबदेखी पुरुषले लोगोसहितको कोट,पाईन्ट र महिला जनप्रतिनिधीले सारी र ब्याउज लगाउने छन। वडादेखी पालिका सम्मका जनप्रतिनिधीहरुले कार्यालय समय र औपचारिक कार्यक्रमहरुमा अनिवार्य पोशाक लगाउने निर्णय गरिएको गाउँपालिका अध्यक्ष झगवहादुर विश्वकर्माले बताउनुभयो।
आमनागरिक तथा सरकारी कर्मचारीलाई जनप्रतिनिधि भनेर चिनारी दिनकै लागि पोशाकमा एकरुपता ल्याउने निर्णय गरिएको अध्यक्ष विश्वकर्माले बताउनुभयो। उहाले भन्नुभयो,’संघिय र प्रदेश सरकारका प्रतिनिधिहरुको आफ्नै पोशाक छ, स्थानिय प्रतिनिधिको पनि आफ्नै पोशाक हुनुपर्छ भनेर एकैखाले पोशाक लागू गरेका हौँ।’
’यसो हुँदा जनप्रतिनिधीलाई मर्यादित मात्र बनाउदैन, जहाँ गएपनी सबैले सरुमारानीका जनप्रतिनिधी रहेछन भनेर चिन्न सक्छन।’
पोशाकसँगै सबै जनप्रतिनिधिले लोगो (चिह्न) समेत अनिवार्य गरिएको छ। नेपालको नक्सा, राष्ट्रिय झण्डासहित सरुमारानीको पहिचान झल्कने गरि लोगो बनाउने तयारी गरिएको पनि अध्यक्ष बिश्वकर्माले सुनाउनुभयो।
आफ्नै लोगो र एकैथरीको पोशाक प्रयोगमा ल्याउने सरुमारानी प्युठान जिल्लामै पहिलो पालिका भएको जनप्रतिनिधिले दाबी गरेका छन् । सरुमारानीमा कुल ३४ जना जनप्रतिनिधी छन।
