संचार हव डट कम
९ साउन, लुम्बिनी प्रदेशमा नेपाली काङ्ग्रेस र नेकपा एमालेको संयुक्त सरकार गठन भएको छ । हाल १२ मन्त्रालय छन् । बुधबार मुख्यमन्त्रीसहित एमालेबाट चार र कांग्रेसबाट चार जना मन्त्रीले पद तथा गोपनीयताको सपथ लिएका छन् ।
एमालेले मुख्यमन्त्री र चार मन्त्री, कांग्रेसले पाँच मन्त्रालय बाँडफाँड गरेका छन् । कांग्रेसबाट थप एक जना मन्त्री पछि नियुक्त हुनेछन् । लुम्बिनी प्रदेश सरकारमा नवनियुक्त पाँच जना मन्त्री नयाँ अनुहारका छन् । विनाविभागी मन्त्रीको रुपमा सपथग्रहण गरेका मन्त्रीहरु ४० देखि ६५ उमेर समुहका रहेका छन् ।
लुम्बिनी प्रदेशसभामा दुई ठूला दलको संयुक्त सरकार पहिलो पटक बनेको हो । एमालेका २९ र कांग्रेसका २७ जना सांसद छन् । एमालेबाट मुख्यमन्त्री आचार्य सहित ३ जना पुराना र दुई जना नयाँ छन् भने कांग्रेसबाट चार मध्ये तिन जना नयाँ अनुहारका हुन् ।
मुख्यमन्त्री बनेका एमाले दल उपनेता आचार्य यसअघि तीन पटक मन्त्रीमा काम गरेको अनुभव छ । एमाले नेता शंकर पोखेरल नेतृत्वको सरकारमा आन्तरिक मामिला तथा कानून मन्त्री, एमाले संसदीय दल नेता लिला गिरी नेतृत्वमा ग्रामीण खानेपानी तथा सहरी विकास र माओवादीका जोखबहादुर महरा नेतृत्वको सरकारमा आर्थिक मामिला तथा योजना मन्त्री भए । कानूनमा स्नातक उतीर्ण ५६ वर्षीय आचार्य अर्घाखाँची निर्वाचन क्षेत्र १ (१) बाट निर्वाचित उनी प्रभावशाली नेताको रुपमा परिचित छन् ।
एमालेबाट विना विभागी मन्त्री भएका रुपन्देहीका ५७ वर्षीय भूमिश्वर ढकाल र गुल्मीका ५० वर्षीय दिनेश पन्थी पुराना अनुहार हुन । ढकाल महरा नेतृत्व सरकारमा खोनपानी तथा सहरी विकास मन्त्री र पन्थी आन्तरिक मामिला तथा कानून मन्त्री थिए । त्यस्तै दाङकी सीता शर्मा र पाल्पाका खेमबहादुर सारु मगर नयाँ हुन । एमालेबाट शर्मा समानुपातिक हुन भने अरु सबै पहिलो हुने निर्वाचन प्रणालीबाट निर्वाचित हुन् ।
कांग्रेसबाट चारै जना पहिलो हुने निर्वाचन प्रणालीबाट विर्वाचित सांसद हुन् । मन्त्रीमा सबैभन्दा जेठो बाँकेका बादशाह कुर्मी ६५ र सबै भन्दा कान्छो प्युठान १(२) का सरोज थापा क्षेत्री (रोज राणा) ४० वर्षीय छन् । थापा यसअघि मन्त्री भैरहेका थिए भने कुर्मी, ५८ वर्षीय गुल्मीका धनेन्द्र कार्की र ४४ वर्षीय दाङका प्रचण्डविक्रम न्यौपाने नयाँ अनुहारका हुन् ।
