प्यूठान , फाल्गुन १९
झइन्द्र भण्डारी
गएराती प्यूठानको माण्डबी गाउँपालिका वडा नम्बर ३ लामाचौरमा मोटर साइकलले ठक्कर दिदा एक पुरूषको मृत्यु भएको छ ।
लामाचौरबाट चकचके तर्फ जाँदै गरेको रा २ प ७४० नम्बरको पल्सर मोटरसाइकलले ठक्कर दिदा माण्डबी गाउँपालिका ३ लामाचौरका ४२ वर्षिय रिम बहादुर खनालको घटना स्थलमै मृत्यु भएको प्रहरीले जनाएको छ ।
मोटरसाइकलमा चालक सहित ३ जना सवार रहेको पनि प्रहरीले जानकारी दिएको छ । ठक्कर दिएर अनियन्त्रीत भएको मोटरसाइकल पल्टिदा मोटरसाइकल चालक नयाँगाउका १८ वर्षीय अविषेक कार्की पनि गम्भीर घाइते भएको र उनलाई उपचारको लागि बुटवल पुराइएको छ ।
इलाका प्रहरी कार्यालय भिङ्ग्रीका प्रमुख प्रहरी निरीक्षक नविन थापाका अनुसार मोटर साइकलमा सवार अन्य २ जना युवकको अवस्था भने सामान्य रहेको छ । उनीहरूलाई उपचारको लागि जिल्ला अस्पताल विजुवार पुराइएको छ ।
पछाडी सवार वडा नम्बर ३ नयाँगाउका १८ वर्षीय सुमन पुन र वडा नम्बर ५ चकचके निवासी १७ वर्षीय शिसिर थापाको हात खुट्टामा सामान्य चोट लागेको छ ।
घटना पछि घटनास्थलको अवस्था केही समय तनावग्रस्त रहेको स्थानीयले सडक अवरुद्ध गरेको भएपनी दुवै तर्फको वार्ता पश्चात उक्त स्थानको वातावरण अहिले सामान्य रहेको र सडक पनि सुचारु भएको छ ।
