जीबन हमाल
बैंकक, थाइल्यान्ड – भोलि साँझ बैंककस्थित अन्तर्राष्ट्रिय स्तरको प्रतिष्ठित लुम्फिनी स्टेडियममा हुने विशेष भिडन्तले नेपाली दर्शकको ध्यान तान्न सफल भएको छ। लामो समयदेखि प्रतिक्षा गरिएको यो प्रतियोगितामा नेपालका गौरव, प्युठान स्याउलिबाङ्गका गुमान घर्ती रिङमा उत्रिन लागेका छन्।
प्युठानको सबैभन्दा अग्लो भू–भाग कोठिभिरको काख स्याउलिबाङ्गमा जन्मिएका गुमान घर्ती पछिल्ला वर्षहरूमा मार्शल आर्ट्स र कम्ब्याट स्पोर्ट्स क्षेत्रमा उदाउँदो तारा बनेका छन्। संसारभरका प्रतिस्पर्धीलाई चुनौती दिंदै आएको उनी भोलिको प्रतिस्पर्धामा पनि नेपालकै झण्डा उच्च राख्ने दाबीका साथ मैदानमा उत्रिने तयारीमा छन्।
घर्तीले यसअघि विभिन्न अन्तर्राष्ट्रिय प्रतियोगितामा उत्कृष्ट प्रदर्शन गर्दै नेपालको नाम विश्वमंचमा चम्काउँदै आएका छन्। यसपटक पनि प्युठान मात्र होइन, समग्र नेपालीहरूका आँखा उनीतर्फै लागेका छन्।
स्थानीयदेखि अन्तर्राष्ट्रिय स्तरसम्म उनीप्रति बढ्दो उत्साह देखिएको छ। प्युठानका युवा, खेलप्रेमी तथा विदेशमा रहेका नेपालीहरूले सामाजिक सञ्जालमार्फत गुमानलाई अघिमै शुभकामना दिँदै हौसला बढाइरहेका छन्।
“नेपालले तिमीसँग ठूलो अपेक्षा राखेको छ, संसारलाई देखाइदेऊ,” भन्ने सन्देशहरू भाइरल भइरहेका छन्। गुमान घर्तीको दाइ जोशन मगर र परिवारले पनि यो क्षणलाई ऐतिहासिक उल्लेख गर्दै देशभरका समर्थकप्रति कृतज्ञता व्यक्त गरेका छन्।
भोलिको भिडन्तले गुमान घर्तीलाई अझै ठूला अवसरहरूको ढोका खोलिदिने विश्वास गरिएको छ।
नेपालभरबाट उनलाई अग्रिम बधाई तथा शुभकामना दिइँदैछ।
