प्युठान । स्वर्गद्वारी नगरपालिका–५ स्यानिलेखस्थित नेपाल राष्ट्रिय आधारभूत विद्यालयको स्थापना भएको ५० वर्ष पूरा भएको अवसरमा आयोजित ऐतिहासिक स्वर्ण जयन्ती समारोह विविध कार्यक्रमसहित भव्य रूपमा सम्पन्न भएको छ।
विद्यालयको शैक्षिक इतिहास, योगदान र उपलब्धिलाई स्मरण गर्दै आयोजना गरिएको स्वर्ण जयन्ती समारोहअन्तर्गत विविध खेलकुद प्रतियोगिता तथा सांस्कृतिक कार्यक्रमहरू सञ्चालन गरिएको थियो।
कार्यक्रमले विद्यार्थी, अभिभावक, शिक्षक तथा स्थानीय समुदायबीच उत्साह र उमङ्ग थपेको छ। उद्घाटन कार्यक्रम विद्यालय व्यवस्थापन समिति अध्यक्ष बालाराम घर्ती मगरको अध्यक्षतामा सम्पन्न भएको थियो भने स्वर्गद्वारी नगरपालिका नगर प्रमुख टेकप्रसाद भण्डारी प्रमुख अतिथिका रूपमा उपस्थित रहनुभएको थियो भने विशेष अतिथि वडा अध्यक्ष गिर बहादुर घर्ती मगर रहनु भएको थियो
कार्यक्रमलाई सम्बोधन गर्दै नगर प्रमुख भण्डारीले नेपाल राष्ट्रिय आधारभूत विद्यालयले ग्रामीण क्षेत्रका बालबालिकालाई शिक्षाको उज्यालो प्रदान गर्दै आएको उल्लेख गर्नुभयो। उहाँले विद्यालयको शैक्षिक गुणस्तर सुधार, भौतिक पूर्वाधार विकास तथा शैक्षिक वातावरण सुदृढीकरणका लागि नगरपालिकाको निरन्तर सहयोग रहने प्रतिबद्धता व्यक्त गर्नुभयो।
त्यसैगरी अध्यक्ष बालाराम घर्ती मगरले विद्यालयको ५० वर्षे यात्रामा योगदान पुर्याउने शिक्षक, विद्यार्थी, अभिभावक तथा शुभेच्छुकप्रति धन्यवाद व्यक्त गर्दै आगामी दिनमा विद्यालयलाई अझ उत्कृष्ट शैक्षिक केन्द्रका रूपमा विकास गरिने प्रतिबद्धता जनाउनुभयो।
स्वर्ण जयन्ती समारोहमा विद्यार्थीहरूले प्रस्तुत गरेका नृत्य, गीत, नाटक लगायत सांस्कृतिक प्रस्तुतिले उपस्थित दर्शकहरूको मन जितेको थियो भने खेलकुद कार्यक्रममार्फत विद्यार्थीहरूमा प्रतिस्पर्धात्मक भावना र अनुशासनको विकास हुने विश्वास व्यक्त गरिएको छ।
कार्यक्रममा स्थानीय जनप्रतिनिधि, शिक्षा क्षेत्रका सरोकारवाला, अभिभावक, पूर्व विद्यार्थी तथा स्थानीयवासीको उल्लेखनीय उपस्थिति रहेको थियो।
