ऐरावतीमा आदिवासी जनजातिहरुका लागि क्षमता अभिवृद्धि तालिम सम्पन्न

जेठ ३२ ,प्युठान ।
ऐरावती गाउँपालिकामा रहेका आदिवासी जनजातिहरुका लागि क्षमता अभिवृद्धि तालिम सम्पन्न भएको छ । रेडियो माण्डवीको आयोजना तथा ऐरावती गाउँपालिकाको सहयोगमा तालिम सञ्चालन गरिएको थियो ।
दुई दिन सम्म चलेको तालिममा सहभागीहरुलाई आदिवासी जनतातीका संविधानमा उल्लेख अधिकार, आदिवासी जनजाती आयोग, आदिवासी जनजाती राष्ट्रिय उत्थान प्रतिष्ठान, आदिवासी जनजातीका सवाल र समस्या, संजाल निर्माण र नेतृत्वको बारेमा जानकारी गराईएको थियो ।
रेडियो माण्डवीका स्टेशन म्यानेजर राजेश जि.सी. को अध्यक्षता ,ऐरावती गाउँपालिकाका अध्यक्ष नविल विक्रम शाहको प्रमुख आतिथ्यतामा भएको समापन कार्यक्रममा ऐरावती गाउँपालिका वडा नं १ का वडा अध्यक्ष अमर बहादुर रेस्मीमगर, वडा नं २ का वडा अध्यक्ष भिमेस कुमार घर्तीमगर, वडा नं ५ का वडा अध्यक्ष चन्द्र बहादुर रोकामगर लगायतको उपस्थिती रहेको थियो ।
समापन कार्यक्रममा गाउँपालिका अध्यक्ष शाहले दुई दिन सम्म चलेको तालिममा जनजातीका बारेमा धेरै कुरामा जानकारी भएको बताउनुभयो । पालिका भित्र भौतिक पूर्वाधार निर्माणको कामसंगै सामाजिक क्षेत्रको विकासका लागि पनि विभिन्न प्रकारका कार्यक्रमहरु गर्दै आएको बताउनुभयो । आगामी दिनमा पनि जनजातीको क्षेत्रमा सहयोग हुने खालका कार्यक्रमहरु गरिने उहाँँको भनाई छ । तालिममा सवै वडाबाट सहभागीहरु सहभागी भएका थिए । तालिमको सहजीकरण पत्रकार सुजल श्रेष्ठले गर्नुभएको थियो ।